Ныне солнце красуяся к высоте восходит
и радуяся землю огревает, -
Взиде бо нам от гроба праведное Солнце-Христос
и вся верующая Ему спасает.
Ныне луна с вышняго соступивши степени
большему светилу честь подавает, -
Уже бо ветхий закон по Писанию с суботами преста
и пророки Христовву закону честь подает.
Ныне зима греховная покаянием престала есть
и лед неверия богораздумием растаяся.
Зима убо языческого кумирослужения
апостольским учением и Христовою верою престала есть,
Лед же Фомина неверия
показанием Христов ребр растаяся.
Днесь весна красуется оживляющи земное естьство,
и бурнии ветри тихо повевающе плоды гобзуют,
И земля семена питающи зеленую траву ражает.
Весна убо красная есть вера Христова,
яже Крещением поражает человеческое паки естьство;
бурнии же ветры - грехотворнии помыслы,
иже покаянием претворьшеся на добродетель
душеполезныя плоды гобзуют;
Земля же естьства нашего, аки семя,
Слово Божие приемши
и страхом его болящи присно,
дух спасения ражает.

20 января 2012 года

Комментарии 0 Мне нравится 5